Avimmaria,
pinsannu a tia, papà,
‘ssittatu o Castidduzzu, dispiratu
pi l’urtima jilata ni l’aranci,
o pirchì hanu pigghiatu a focu ‘alivi,
o, chiù spissu, pirchì eri acchiffaratu
cu a pulitica, pi tia a cchiù sbagghiata,
di marca miricana e comunista,
senza vinciri mai, senza paroli
pi fàriti scutari, senza l’Africa,
unni lassasti u cori; a Dire Dawa,
padruni dintra a “Trattoria Italia”,
‘iutatu di to frati e Zaccaria
pirdisti contru i scimmii e contru i glisi
e dda ristau to frati mortu,
a megghiu gioventù e
na bannera ca suttaterra aspetta
e cchiù nun spera. Quannu perda è tintu
cu quannu vìncia è bonu.
